Related Posts
Category : National
અમેરિકાના F-35 ફાઈટર જેટ ભંગાર, અનેક વખત દુર્ઘટનાગ્રસ્ત… છતાં ટ્રમ્પ ભારતને વેચવા ઉતાવળા
Modi -Trump F-35 Deal: આ વર્ષે 28 જાન્યુઆરીએ અલાસ્કામાં ઈલસન યુએસ એરફોર્સ બેઝ પર ટ્રેનિંગ સેશન દરમિયાન F-35A ફાઈટર પ્લેન ક્રેશ થયું હતું. આ ઘટનાએ ફરી એકવાર આ વિવાદાસ્પદ વિમાનની સલામતી, વિશ્વસનીયતા અને ઓપરેશનલ ક્ષમતા પર સવાલો ઉભા કર્યા છે.
એવામાં હવે અમેરિકન પ્રમુખ ડોનાલ્ડ ટ્રમ્પે વડાપ્રધાન નરેન્દ્ર મોદી સાથે સંયુક્ત પ્રેસ કોન્ફરન્સમાં કહ્યું કે અમેરિકા ભારતને અત્યાધુનિક F-35 ફાઈટર એરક્રાફ્ટ વેચશે. આ સાથે ભારત અત્યાધુનિક સ્ટીલ્થ એરક્રાફ્ટ ધરાવતા દેશોની વિશિષ્ટ ક્લબમાં સામેલ થશે. પરંતુ મોટો પ્રશ્ન એ છે કે ટ્રમ્પ ભારતને આટલી ખામીઓ સાથે F-35 ફાઈટર પ્લેન વેચવાની ઉતાવળ કેમ કરી રહ્યાં છે.
1000 થી વધુ F-35 વિશ્વના ઘણા દેશોને પહોંચાડાયા F-35 લાઈટનિંગ II એ અમેરિકન એરોસ્પેસ જાયન્ટ લોકહીડ માર્ટિન દ્વારા વિકસિત પાંચમી પેઢીનું ફાઈટર એરક્રાફ્ટ છે, જેની પ્રથમ ઉડાન ડિસેમ્બર 2006માં થઈ હતી. આ લશ્કરી વિમાન અદ્યતન સ્ટીલ્થ ક્ષમતાઓ, અદ્યતન એવિઓનિક્સ અને આધુનિક શસ્ત્રોથી સજ્જ છે. આજની તારીખમાં, અમેરિકન સૈન્ય અને વૈશ્વિક ભાગીદારોને 1000 થી વધુ વિમાનોનો સપ્લાય કરવામાં આવ્યો છે.
2018 થી F-35 એરક્રાફ્ટના 12 અકસ્માત
F-35 એરક્રાફ્ટમાં ઘણી ખામીઓ જોવા મળી રહી છે. 2018થી અત્યાર સુધીમાં ઓછામાં ઓછા આ વિમાનના 12 અકસ્માત થયા છે. તેની વિશ્વસનીયતા, જાળવણી, પ્રોજેક્ટમાં વિલંબ અને ખર્ચમાં વધારા અંગે પણ ચિંતા વધી છે. F-35 સાથે ઘણી બધી સમસ્યાઓને જોતાં, માનવસહિત લડાયક વિમાનના ભવિષ્યને લઈને પ્રશ્નો ઉભા થયા છે.
મસ્કે પણ F-35 એરક્રાફ્ટને પણ નકામું ગણાવ્યું હતું
ગત વર્ષે નવેમ્બરમાં જ, સ્પેસએક્સના માલિક ઇલોન મસ્કએ X પર એક વીડિયો પોસ્ટ કર્યો હતો, જેમાં સેંકડો નાના ડ્રોન એકસાથે દેખાતા હતા. તે સમયે તેમણે કહ્યું હતું કે કેટલાક મૂર્ખ લોકો હજુ પણ F-35 જેવા માનવયુક્ત ફાઇટર જેટ બનાવી રહ્યા છે. માનવસહિત ફાઇટર જેટ પહેલેથી જ ડ્રોનના યુગમાં અપ્રચલિત છે. આનાથી માત્ર પાયલોટ જ માર્યા જશે. પાઇલોટેડ ફાઇટર જેટ્સ એ મિસાઇલની રેન્જને વધારવા અથવા બોમ્બમારો કરવા માટેની એક બિનકાર્યક્ષમ રીત છે. તે જ સમયે, ડ્રોન માનવ પાઇલટ વિના આ કામ કરી શકે છે.
પેન્ટાગોને પણ આ વિમાનને ભંગાર ગણાવ્યું હતું
અમેરિકા દાવો કરે છે કે તેનું F-35 ફાઈટર પ્લેન સુપર ફાઈટર જેટ છે. F-35 સ્ટીલ્થ ફિચર્સથી સજ્જ છે, જેને કોઈ રડાર ડિટેક્ટ કરી શકતું નથી. ગયા વર્ષે પેન્ટાગોનના એક રિપોર્ટમાં કહેવામાં આવ્યું હતું કે આ ફાઈટર એરક્રાફ્ટ તેની ઓપરેશનલ ક્ષમતાને પૂર્ણ કરવામાં સક્ષમ નથી. પેન્ટાગોનના રિપોર્ટમાં જણાવાયું છે કે F-35માં 65 ઓપરેશનલ ખામીઓ છે. રિપોર્ટમાં એવો આક્ષેપ કરવામાં આવ્યો છે કે આ ખામીઓને કારણે F-35 એરક્રાફ્ટ મૂળભૂત પરીક્ષણ વિશિષ્ટતાઓને પૂર્ણ કરવામાં નિષ્ફળ જાય છે.
આટલી બધી ખામીઓ છતાં કેમ વેચાઈ રહ્યા છે વિમાન?
લોકહીડ માર્ટિન જેવી ઘણી મોટી એરક્રાફ્ટ મેન્યુફેક્ચરિંગ કંપનીઓનું યુએસ સરકાર પર દબાણ છે. ઘણા મોટા નેતાઓએ પણ આમાં પૈસા રોક્યા છે. આવી સ્થિતિમાં તેમના પર તેમના સહયોગી દેશોને આ એરક્રાફ્ટ આપવા માટે દબાણ કરવામાં આવે છે.
Load more
